kaun sī manzil hai jo be-ḳhvāb āñkhoñ meñ nahīñ

ek sūraj DhūñDhtā huuñ jo ki sapnoñ meñ nahīñ

dekhtā rahtā huuñ miTte shahr ke naqsh-o-nigār

aañkh meñ vo sūrateñ bhī haiñ ki galiyoñ meñ nahīñ

mausamoñ kā ruḳh udhar ko hai havāoñ kā idhar

jañgaloñ meñ baat koī hai ki shahroñ meñ nahīñ

piilī piilī titliyāñ haiñ aur mahrūmī kā raqs

kaun sā vo zā.iqa hogā ki phūloñ meñ nahīñ

yuuñ to har jānib khaḌe haiñ ye qatār-andar-qatār

ek ThanDak hai ki in peḌoñ ke sāyoñ meñ nahīñ

chāñd tāroñ kī ziyā.eñ kahkashāoñ ke hujūm

kaun sā vo āsmāñ hai jo zamīnoñ meñ nahīñ