rah gayā ḳhvāb-e-dil-ārām adhūrā kis kā
Dhal ga.ī shab to khulā hai ye darīcha kis kā
lamha lamha mujhe vīrān kiye detā hai
bas gayā mere tasavvur meñ ye chehra kis kā
āzmā.ish kī ghaḌī hai sar-e-maqtal dekheñ
zer-e-ḳhanjar vahī rahtā hai irāda kis kā
ye jo bedār bhī haiñ so.e hue bhī in meñ
shaam kis kī hai ḳhudā jaane saverā kis kā
rah-rav-e-āḳhir-e-shab haiñ sabhī uktā.e hue
kaun kab tak hai yahāñ saath bharosa kis kā
mere qātil ke tajassus meñ bhaTakne vaalo
ḳhuun ālūd hai bastī meñ pasīna kis kā
ā.īna-ḳhāna do-ālam ko banā kar ai 'dil'
muntazir baiThā hai vārafta-o-shaidā kis kā