mujh meñ aa kar Thahar gayā koī
husn-e-dil meñ utar gayā koī
kaisī dī ye mujhe kitāb-e-ishq
paḌhte paḌhte bikhar gayā koī
aaj ḳhushbū bhare gulāboñ se
mere dāman ko bhar gayā koī
apnā apnā thā aa.ina sab kā
jaane kis meñ sañvar gayā koī
hāl-e-dil us ne aaj kyā pūchhā
jaise dariyā Thahar gayā koī
le ke kāñdhoñ pe apne phirtī huuñ
mere andar hī mar gayā koī
raushnī bhiik meñ nahīñ miltī
apnī jaañ se guzar gayā koī
ab na hañstī huuñ aur na rotī huuñ
kaisā jaadū sā kar gayā koī
raakh kahtī thī 'sham.a' kī uḌ kar
haa.e vaqt-e-sahar gayā koī