hāthoñ meñ liye dil ke nazrāne nazar aa.e
yuuñ bhī tirī rāhoñ meñ dīvāne nazar aa.e
farzānoñ kī bastī meñ dīvāne nahīñ dekhe
dīvānoñ kī bastī meñ farzāne nazar aa.e
ab tak tirī duniyā kā iqbāl thā rakhvālā
aage tirī duniyā meñ kyā jaane nazar aa.e
kaliyoñ ke chaTakte hī ye kaisī fazā badlī
dāman meñ gulistāñ ke vīrāne nazar aa.e
maazī ke dhuñdlakoñ meñ maiñ kho sā gayā aksar
aise bhī risāloñ meñ afsāne nazar aa.e
guzre na 'jalīl' aise hālāt se dushman bhī
jaane hue sāthī bhī anjāne nazar aa.e