le gayā vo saath apne husn saarā shaam kā
hijr kī tasvīr hai ab har nazāra shaam kā
ḳhema-zan haiñ chāñd ke raste meñ gahrī badliyāñ
āñdhiyoñ kī zad meñ hai pahlā sitāra shaam kā
raushnī aur tīrgī kī sarhadeñ thāme hue
darmiyāñ din raat ke bahtā hai dhārā shaam kā
lauT kar vo shaam se pahle hī ghar aane lagā
un se shāyad chhin gayā koī sahārā shaam kā
Dūbte sūraj kā manzar dekhnā 'jāved' roz
mashġhala hai ek muddat se hamārā shaam kā