tum siikh to lo pahle zarā ḳhaak pe rahnā
phir chāhe mah-o-anjum-o-aflāk pe rahnā
sūrat hī na ban paatī koī hairat-e-dil kī
miTTī ko na raas aatā agar chaak pe rahnā
har shaam sitam laatī hai ik sub.h-e-ġharībāñ
ai rañg-e-vafā chādar-e-sad-chāk pe rahnā
khulne hī nahīñ detā koī rañg-e-tamannā
har lamha kisī ḳhauf kā idrāk pe rahnā
ho phir se chaman-zār-e-mohabbbat mirā sarsabz
ai shabnam-e-rahmat mire ḳhāshāk pe rahnā