milte nahīñ ho ham se ye kyā huā vatīrā

milne lagā hai shāyad ab tum se koī ḳhīrā

āñkhoñ hī meñ uḌāyā naqd-e-dil-o-jigar ko

vo shoḳh dil-rubā hai kaisā aThā.ī-gīrā

ulfat kā jurm be-shak sarzad huā hai ham se

is ko saġhīra samjho chāhe ise kabīrā

maidān-e-hashr terā kūcha banā hai qātil

jaatā hai ab jo koī aatā hai qash.arīrā

girvīda kar liyā hai naira.gī-e-nazar ne

kaisī huī fusūñ-gar vo shoḳh chashm-e-gīrā

us shoḳh dil-rubā par kyūñkar na hoñ fidā ham

saj-dhaj huī nirālī bāñdhā jo us ne chīrā

minnat-pazīr us ke āḳhir ko ho ga.e ham

jo mudda.ā thā apnā us ne kiyā pazīrā

shāġhil jo ho ga.e haiñ mahmūd āqibat haiñ

sultāna shaġhl-e-shab hai din kā huā nasīrā

the shefta jo 'sāqī' ik mast-e-nosh lab ke

maiḳhāne hī ke andar apnā banā ḳhatīrā