dil-soḳhta ko apne jalāyā ġhazab kiyā

nairañg tum ne kyā ye dikhāyā ġhazab kiyā

zinda kiyā hai hasrat-e-murda ko bevafā

tū ba.ad-e-marg gor pe aayā ġhazab kiyā

ye dard-e-dard-mañd tamāshā dikhā.egā

āfat-rasīda ko jo satāyā ġhazab kiyā

ham ḳhānumāñ-ḳharāb bhaTakte kahāñ phireñ

baiThe biThā.e us ne uThāyā ġhazab kiyā

sab kah rahe the bulbul-e-kashmīr ke harīf

us gul ne apnā yaar banāyā ġhazab kiyā

majzūb-o-mast pīr-e-muġhāñ kyuuñ na vo rahe

'sāqī' ko jām-e-jazb pilāyā ġhazab kiyā