dil se armāñ nikal rahe haiñ

mere bhī din badal rahe haiñ

varna ghar meñ hai ghup añdherā

yādoñ ke charāġh jal rahe haiñ

ye ajab log haiñ ki un ke

paañv nahīñ pe chal rahe haiñ

ham dar-e-shāh par savālī

aaj haiñ aur na kal rahe haiñ

vo hī pahuñcheñge yaar tak jo

girte girte sambhal rahe haiñ

ham niko naam to hue par

dil pe aare se chal rahe haiñ

un ko āzād kar jo ab tak

zer-e-habs-e-ilal rahe haiñ

un ko mahbūs kar jo kab se

qā.ede sab kuchal rahe haiñ

kah na karb-o-balā kā qissa

lafzoñ ke dil dahal rahe haiñ