sunā rahe haiñ vo yuuñ e'tibār ke qisse
ḳhizāñ ke daur meñ jaise bahār ke qisse
kaheñge ham bhī kabhī intizār ke qisse
tumhārā pyaar shajar aur pyaar ke qisse
udaas lahje meñ kuchh sher haiñ jo rūmānī
unheñ samajhnā ki sab haiñ udhār ke qisse
diloñ kī tah meñ sadā ashk ubalte rahte haiñ
har ek sahrā meñ haiñ ābshār ke qisse
ye soch kar hī inheñ nazm kar liyā maiñ ne
qarār deñge dil-e-be-qarār ke qisse