ye sannāTā hai maiñ huuñ chāñdnī meñ
mazā bhī ḳhuub hai āvārgī meñ
laboñ par muskurāhaT gaal giile
tirā ġham ghul gayā merī ḳhushī meñ
zarā sī der ko khiḌkī jo khole
farishte ghūmeñge us kī galī meñ
ghaḌī ke pair thakte hī nahīñ kyā
ghaḌī ījād kī thī kis ghaḌī meñ
jo miTTī ke banā.e the ḳhudā ne
ye aise log hai kūza-garī meñ
jo but-ḳhāne meñ tujh ko soch leñ to
bhaTak jaate haiñ rasta bandagī meñ
mirī pahlī mohabbat tum thī jānāñ
tumheñ zinda rakhūñgā shā.irī meñ