shīshe meñ hai sharāb to shīsha sharāb meñ
ya.anī hai āftāb had-e-āftāb meñ
sarzad hue gunāh jo ahd-e-shabāb meñ
mālik mire inheñ tū na rakhnā hisāb meñ
aalam yahī rahā to nigāhoñ kā zikr kyā
niyyat bhī Duub jā.egī jām-e-sharāb meñ
ai barq kyā hamīñ ko miTānā chaman meñ thā
thā aur āshiyāñ na koī intiḳhāb meñ
'afqar' ye sab haiñ un ke tabassum kī shoḳhiyāñ
rañgīniyāñ jo ban ga.iiñ mauj-e-sharāb meñ