ham na chhoḌeñge mohabbat tirī ai zulf-e-siyāh
sar chaḌhāyā hai tū kyā dil se girā.eñ tujh ko
chhoḌ kar ham ko milā sham.a-ruḳhoñ se jā kar
isī qābil hai tū ai dil ki jalā.eñ tujh ko
dard-e-dil kahte hue bazm meñ aatā hai hijāb
taḳhliya ho to kuchh ahvāl sunā.eñ tujh ko
apne ma.ashūq kī suntā hai burā.ī koī
kyuuñ na ham bigḌeñ jo aġhyār banā.eñ tujh ko
rūThtā huuñ jo kabhī maiñ to ye kahtā hai vo shoḳh
kyā ġharaz ham ko paḌī hai jo manā.eñ tujh ko
tū ne aġhyār se ā.īna mañgā kar dekhā
dil meñ aatā hai ki ab muñh na dikhā.eñ tujh ko