abas hai pesh-e-arbāb-e-suḳhan azm-e-suḳhan mujh ko
vafā kahne na degī qissa-e-rañj-o-mehan mujh ko
qafas meñ mil gayā hai in dinoñ kuchh lutf hī aisā
ki bhūle se nahīñ aatī kabhī yād-e-chaman mujh ko
ḳhizāñ kī āfateñ phirtī haiñ ab tak merī nazroñ meñ
bahār-e-chañd-roza kyā dikhātā hai chaman mujh ko
but-e-tarrār se jab shikva-e-bedād kartā huuñ
sunātā hai vo zālim sar-guzasht-e-kohkan mujh ko
vo hañs kar dekh lete haiñ jo kūche se guzartā huuñ
mubārakbād 'beḳhud' merā ye dīvāna-pan mujh ko