añdheroñ se mirā rishta bahut hai
maiñ jugnūñ huuñ mujhe dikhtā bahut hai
vatan ko chhoḌ kar hargiz na jaanā
muhājir aañkh meñ chubhtā bahut hai
ḳhushī se us kī tum dhoka na khānā
pareshānī meñ vo hañstā bahut hai
kisī mausam kī fitrat jānñe ko
shajar kā ek hī pattā bahut hai
mohabbat kā patā detī haiñ āñkheñ
zabāñ se vo kahāñ khultā bahut hai
miyāñ us shaḳhs se hoshiyār rahnā
sabhī se jhuk ke jo miltā bahut hai