bādal chhaTe to raat kā har zaḳhm vā huā
aañsū ruke to aañkh meñ mahshar bapā huā
sūkhī zamīñ pe bikhrī huī chand pattiyāñ
kuchh to batā nigār-e-chaman tujh ko kyā huā
aise baḌhe ki manzileñ raste meñ bichh ga.iiñ
aise ga.e ki phir na kabhī lauTnā huā
ai justujū kahāñ ga.e vo hausle tire
kis dasht meñ ḳharāb tirā qāfila huā
pahuñche pas-e-ḳhayāl to dekhā ki ret par
ḳhema thā ek phuul kī sūrat khilā huā
aa.ī shab-e-siyah to diye jhilmilā uThe
thā raushnī meñ shahr hamārā bujhā huā