manzar thā raakh aur tabī.at udaas thī

har-chand terī yaad mire aas paas thī

mīloñ thī ik jhulastī huī dopahar kī qaash

siine meñ band saiñkaḌoñ sadiyoñ kī pyaas thī

uTThe nahā ke sho.aloñ meñ apne to ye khulā

saare jahāñ meñ phailī huī terī baas thī

kaise kahūñ ki maiñ ne kahāñ kā safar kiyā

ākāsh be-charāġh zamīñ be-libās thī

ab dhuul meñ aTī huī rāhoñ pe hai safar

vo din ga.e ki pāñv-tale narm ghaas thī