na āñkheñ hī jhapaktā hai na koī baat kartā hai

bas ik aañsū ke daane par basar-auqāt kartā hai

shajar ke tan meñ gahrā zaḳhm hai koī vagarna yuuñ

zamīñ par sabz pattoñ kī koī barsāt kartā hai

vo jab chāhe bujhā detā hai sham.eñ bhī sitāre bhī

nagar saarā supurd-e-panja-e-zulmāt kartā hai

vo apnī baat se sad-chāk kartā hai mirā siina

phir apnī baat kī tā-der tāvīlāt kartā hai

vo apnī umr ko pahle piro letā hai Dorī meñ

phir us ke ba.ad gintī umr kī din raat kartā hai