ham yaar kī ġhairoñ pe nazar dekh rahe haiñ
go muñh pe na lā.eñge magar dekh rahe haiñ
muñh merī taraf hai to nazar ġhair kī jānib
karte haiñ kidhar baat kidhar dekh rahe haiñ
kai roz raqīboñ se nibhī rasm-e-mohabbat
ham bhī yahī ai rashk-e-qamar dekh rahe haiñ
qāsid se jo bīmār bahut mujh ko sunā thā
aḳhbār meñ marne kī ḳhabar dekh rahe haiñ
pursāñ nahīñ koī bhī 'nasīm' ahl-e-hunar kā
duniyā kī havā shaam o sahar dekh rahe haiñ