sīdhā sachchā tumheñ ai jān-e-jahāñ jaane kaun
dil ko lagtī na ho jo baat use maane kaun
thā abhī to dil-e-betāb mire pahlū meñ
le gayā āñkhoñ hī āñkhoñ meñ ḳhudā jaane kaun
phaaḌ Dālīñ haiñ guloñ ne jo qabā.eñ apnī
baaġh meñ aaj gayā thā ye havā khāne kaun
tum na the mahfil-e-aġhyār meñ sharminda na ho
muñh chhupā.e hue baiThā thā ḳhudā jaane kaun
kūcha-e-yār kabhī tujh se na chhūTegā 'nasīm'
go ye qasmeñ tirī sachchī hoñ magar maane kaun