garebāñ haath meñ hai paañv meñ sahrā kā dāmāñ hai

bas ab paañv haiñ apne aur sar-e-ḳhār-e-muġhīlāñ hai

havā-e-dasht-e-vahshat ham ko le uḌtī hai bastī se

hamārā unsur-e-ḳhākī magar reg-e-bayābāñ hai

sabaq ko dekhtā huuñ raat bhar aur phir ulajhtā huuñ

mutavval muḳhtasar vo sharh-e-sher-e-zulf-e-pechāñ hai

jalātā hai ye parvānoñ ko vasf-e-sho.ala-rūyāñ se

zabān-e-ḳhāma bhī ab to zabān-e-sham-e-sozāñ hai