qābiz rahā hai dil pe jo sultān kī tarah

āḳhir nikal gayā shah-e-īrān kī tarah

zāhir meñ sard o zard hai kāġhān kī tarah

lekin mizāj us kā hai multān kī tarah

rāz-o-niyāz meñ bhī akaḌ-fūñ nahīñ ga.ī

vo ḳhat bhī likh rahā hai to chālān kī tarah

luqma halāl kā jo milā ahl-kār ko

us ne chabā ke thuuk diyā paan kī tarah

zikr us parī-jamāl kā jab aur jahāñ chhiḌā

fauran raqīb aa gayā shaitān kī tarah

ik lamha us kī diid huī bas kī bhiiḌ meñ

aur phir vo kho gayā mire ausān kī tarah

maiñ mubtalā-e-qarz rahā chaar saal tak

vo sirf chaar din rahā mehmān kī tarah

har baat ke javāb meñ fauran nahīñ nahīñ

niklā zabān-e-yār se gardān kī tarah

'shāhid' se kah rahe ho ki roze rakhā kare

har maah jis kā guzrā hai ramzān kī tarah