jab duā.eñ bhī kuchh asar na kareñ
kyā kareñ sabr ham agar na kareñ
dāstāñ ḳhatm ho hī jā.egī
aap qisse ko muḳhtasar na kareñ
chhoḌtā hī nahīñ hameñ sayyād
varna parvā-e-bāl-o-par na kareñ
qābil-e-afv maiñ nahīñ na sahī
na kareñ aap darguzar na kareñ
un ko ehsās-e-dard-e-dil kaisā
mar bhī jā.ūñ to aañkh tar na kareñ
us kī bechārgī kā kyā kahnā
jis kī aa.heñ bhī kuchh asar na kareñ
ye bhī tash.hīr-e-shā.erī hai 'josh'
aap dīvān mushtahar na kareñ