jitne the tire jalve sab ban ga.e but-ḳhāne
ab chashm-e-tamāshā.ī kyuuñ kar tujhe pahchāne
asrār haqīqat ke samjhe nahīñ farzāne
taqsīr to thī un kī maare ga.e dīvāne
mastān-e-mohabbat ne duniyā meñ yahī dekhā
TuuTe hue paimāne TuuTe hue mai-ḳhāne
phūloñ kī hañsī se bhī dil jin kā nahīñ khiltā
un ko bhī hañsāte haiñ hañste hue paimāne
vo haal sunā.ūñ kyā jo ġhair-mukammal hai
ab tak kī to maiñ jānūñ aage kī ḳhudā jaane
jhagḌā na kabhī uThtā tū-tū na kabhī hotī
kuchh shaiḳh hai dīvāna kuchh riñd haiñ dīvāne
vo mujh pe karam-farmā hogā ki nahīñ hogā
yā us ko ḳhudā jaane yā merī qazā jaane
ham kahte rahe jab tak rūdād mohabbat kī
hañste rahe farzāne rote rahe dīvāne
samjhā thā jinheñ apnā jab un kī ravish ye hai
auroñ kī shikāyat kyā begāne to begāne
vahshat to nahīñ mujh ko ai 'josh' magar phir bhī
yaad aate haiñ rah rah kar chhoḌe hue vīrāne