kis kā sho.ala jal rahā hai sho.alagī se māvarā
kaun raushan hai bhalā is raushnī se māvarā
jiite jī to kuchh nahīñ dekhā nazar se haañ magar
hairateñ DhūñDā kiye is hairatī se māvarā
kaun sā aalam hai mālik tere aalam meñ nihāñ
kaun sajde meñ chhupā hai bandagī se māvarā
koī to batlā.egā aage kahāñ muḌtī hai raah
koī to hogī zamīñ us malgajī se māvarā
baat jiine kī adā tak ḳhūb-sūrat hai magar
zindagī kuchh aur hai is zindagī se māvarā
ḳhāk-basta phir rahā hai kaun sī bastī meñ dil
kaun āḳhir ḳhasta-jāñ hai ḳhastagī se māvarā
ik nagar tarsā huā hai aur sahrā hai tavīl
aur ik naddī hai koī tishnagī se māvarā
kab se ḳhālī haath hai yaañ ek ḳhilqat ishq kī
ham bhī ho jā.eñge ek din bebasī se māvarā
in farāvāñ ne.amatoñ aur barkatoñ ke bāvajūd
koī muflis chal diyā hai muflisī se māvarā
apnī duniyā meñ agar phailī hai tārīkī to kyā
din kahīñ niklā to hogā tīrgī se māvarā