āñkhoñ meñ base ho tum āñkhoñ meñ ayaañ ho kar
dil hī meñ na rah jaao āñkhoñ se nihāñ ho kar
haañ lab pe bhī aa jaao andāz-e-bayāñ ho kar
āñkhoñ meñ bhī aa jaao ab dil kī zabāñ ho kar
khul jaao kabhī mujh se mil jaao kabhī mujh ko
rahte ho mire dil meñ ulfat kā gumāñ ho kar
hai shaiḳh kā ye aalam allāh re badmastī
āñkhoñ hī se zāhir hai aayā hai jahāñ ho kar
badnāmī o barbādī anjām-e-mohabbat haiñ
duniyā meñ rahā 'farhat' rusvā-e-jahāñ ho kar