hai aarzū ye jī meñ us kī galī meñ jāveñ

aur ḳhaak apne sar par man māntī uḌāveñ

shor-e-junūñ hai ham ko aur fasl-e-gul bhī aa.ī

ab chaak kar garebāñ kyūñkar na ban meñ jāveñ

be-dard log sab haiñ hamdard ek bhī nahīñ

yaaro ham apne dukh ko jā kis ke ta.iiñ sunāveñ

ye aarzū hamārī muddat se hai ki jā kar

qātil kī teġh ke ta.iiñ apnā lahū chaTāveñ

ḳhajlat se ḳhuuñ meñ Duube yā aag se lage uTh

laala ke ta.iiñ chaman meñ gar dāġh-e-dil dikhāveñ

be-iḳhtiyār sun kar mahfil meñ sham.a ro de

ham baat soz-e-dil kī gar Tuk zabāñ pe lāveñ

yahāñ yaar aur bardār koī nahīñ kisī kā

duniyā ke biich 'tābāñ' ham kis se dil lagāveñ