ab tire lams ko yaad karne kā ik silsila aur dīvāna-pan rah gayā
tū kahīñ kho gayā aur pahlū meñ terī shabāhat liye ik badan rah gayā
vo sarāpā tirā vo tire ḳhāl-o-ḳhad merī yādoñ meñ sab muntashir ho ga.e
lafz kī justujū meñ laraztā huā nīm-vā sā faqat ik dahan rah gayā
harf ke harf se kyā tazādāt haiñ tū ne bhī kuchh kahā maiñ ne bhī kuchh kahā
tere pahlū meñ duniyā simaTtī ga.ī mere hisse meñ harf-e-suḳhan rah gayā
tere jaane se mujh par ye uqda khulā rañg-o-ḳhushbū to bas terī mīrās the
ek hasrat sajī rah ga.ī gul-ba-gul ek mātam chaman-dar-chaman rah gayā
ek be-nām ḳhvāhish kī pādāsh meñ terī palkeñ bhī bāham piro dī ga.iiñ
ek vahshat ko sairāb karte hue meñ bhī āñkhoñ meñ le kar thakan rah gayā
arsa-e-ḳhvāb se vaqt maujūd ke rāste meñ gañvā dī ga.ī guftugū
ek isrār kī bebasī rah ga.ī ek inkār kā bāñkpan rah gayā
tū sitāroñ ko apnī jilau meñ liye jā rahā thā tujhe kyā ḳhabar kyā huā
ik tamannā darīche meñ baiThī rahī ek bistar kahīñ be-shikan rah gayā