koī milā to kisī aur kī kamī huī hai

so dil ne be-talabī iḳhtiyār kī huī hai

jahāñ se dil kī taraf zindagī utartī thī

nigāh ab bhī usī baam par jamī huī hai

hai intizār use bhī tumhārī ḳhush-bū kā

havā galī meñ bahut der se rukī huī hai

tum aa ga.e ho to ab ā.īna bhī dekheñge

abhī abhī to nigāhoñ meñ raushnī huī hai

hamārā ilm to marhūn-e-lauh-e-dil hai miyāñ

kitāb-e-aql to bas taaq par dharī huī hai

banāo saa.e harārat badan meñ jazb karo

ki dhuup sehan meñ kab se yūñhī paḌī huī hai

nahīñ nahīñ maiñ bahut ḳhush rahā huuñ tere baġhair

yaqīn kar ki ye hālat abhī abhī huī hai

vo guftugū jo mirī sirf apne-āp se thī

tirī nigāh ko pahuñchī to shā.irī huī hai