mire ḳhvāboñ se ojhal us kā chehra ho gayā hai
maiñ aisā chāhtā kab thā par aisā ho gayā hai
ta.alluq ab yahāñ kam hai mulāqāteñ ziyāda
hujūm-e-shahr meñ har shaḳhs tanhā ho gayā hai
tirī takmīl kī ḳhvāhish to puurī ho na paa.ī
magar ik shaḳhs mujh meñ bhī adhūrā ho gayā hai
jo bāġh-e-ārzū thā ab vahī hai dasht-e-vahshat
ye dil kyā hone vaalā thā magar kyā ho gayā hai
maiñ samjhā thā siyegī āgahī chāk-e-junūñ ko
magar ye zaḳhm to pahle se gahrā ho gayā hai
maiñ tujh se saath bhī to umr-bhar kā chāhtā thā
so ab tujh se gilā bhī umr-bhar kā ho gayā hai
tire aane se aayā kaun sā aisā taġhayyur
faqat tark-e-marāsim kā mudāvā ho gayā hai
mirā aalam agar pūchheñ to un se arz karnā
ki jaisā aap farmāte the vaisā ho gayā hai
maiñ kyā thā aur kyā huuñ aur kyā honā hai mujh ko
mirā honā to jaise ik tamāshā ho gayā hai
yaqīnan ham ne aapas meñ koī va.ada kiyā thā
magar us guftugū ko ek arsa ho gayā hai
agarche dastaras meñ āgahī hai saarī duniyā
magar dil kī taraf bhī ek dar vā ho gayā hai
ye bechainī hamesha se mirī fitrat hai lekin
ba-qadr-e-umr is meñ kuchh izāfa ho gayā hai
mujhe har sub.h yaad aatī hai bachpan kī vo āvāz
chalo 'irfān' uTh jaao saverā ho gayā hai