sadā fariyād kī aa.e kahīñ se
vo zālim bad-gumāñ hogā hamīñ se
ḳhudā samjhe but-e-sehr-āfrīñ se
garebāñ ko laḌāyā āstīñ se
chaman hai sho.ala-e-gul se charāġhāñ
bahār aa.ī navā-e-ātishīñ se
ḳhirad hai ab bhī jis ke hal se aajiz
vo nukte hal kiye ham ne yaqīñ se
salāmat vus.at-ābād-e-mohabbat
bahut aage haiñ ham duniyā-o-dīñ se
ma.āz-allāh jalāl us āstāñ kā
Tapak paḌte haiñ sajde ḳhud jabīñ se