dil ko ba-nām-e-ishq sajānā paḌā hameñ
phir ik fareb dil meñ basānā paḌā hameñ
ye kis kā haal kis ko sunānā paḌā hameñ
aur dil kā haal dil se chhupānā paḌā hameñ
jal kar bhī tere naam kī ḳhushbū bikher de
phūloñ meñ aisī aag lagānā paḌā hameñ
dāman ye ḳhaar se nahīñ phūloñ se taar hai
jaane ye kaisā qarz chukānā paḌā hameñ
jab se ḳhushī salīb-e-mohabbat pe chaḌh ga.ī
hañsnā bhī ab udhār meñ laanā paḌā hameñ
khulte haiñ roz kyā ye mohabbat ke mai-kade
ye aazmā ke dekhne jaanā paḌā hameñ
ik aarzū ke vāste kyā kyā nahīñ kiyā
'ahmad' 'nisār' dil ko jalānā paḌā hameñ