bas ek buuñd thī aurāq-e-jāñ meñ phail ga.ī
zarā sī baat mirī dāstāñ meñ phail ga.ī
havā ne haath baḌhāyā hī thā ki lau merī
tamām shash-jihāt-e-jism o jaañ meñ phail ga.ī
vo ḳhvāb thā ki khulā thā darīcha-e-shab-e-hijr
tire visāl kī ḳhushbū makāñ meñ phail ga.ī
jo us ke baad havā us se be-ḳhabar the sab
havā ne kuchh na kahā bādbāñ meñ phail ga.ī
khulā ki vahm thā aab o sarāb kī tamīz
pyāsī dhuup thī āb-e-ravāñ meñ phail ga.ī
maiñ us ke tarz-e-taḳhātub kā zahr pī to gayā
magar ajiib sī talḳhī zabāñ meñ phail ga.ī
ziyāñ-nasīb shi.ār-e-vafā sirisht meñ hai
ye baat kaise saf-e-dushmanāñ meñ phail ga.ī