āñkhoñ meñ dhuup dil meñ harārat lahū kī thī
ātish javān thā to qayāmat lahū kī thī
zaḳhmī huā badan to vatan yaad aa gayā
apnī girah meñ ek rivāyat lahū kī thī
ḳhanjar chalā ke mujh pe bahut ġham-zada huā
bhaa.ī ke har sulūk meñ shiddat lahū kī thī
koh-e-girāñ ke sāmne shīshe kī kyā bisāt
ahd-e-junūñ meñ saarī sharārat lahū kī thī
ruḳhsār o chashm-o-lab gul o sahbā shafaq hinā
duniyā-e-rañg-o-bū meñ tijārat lahū kī thī
'ḳhālid' har ek ġham meñ barābar sharīk thā
saare jahāñ ke biich rifāqat lahū kī thī