shikva apne tāle.oñ kī nā-rasā.ī kā karūñ
yā gila ai shoḳh terī bevafā.ī kā karūñ
vo ki ik muddat talak jis ko bhalā kahtā rahā
aah ab kis muñh se zikr us kī burā.ī kā karūñ
āb-e-zamzam se maiñ dho luuñ apnī peshānī ke ta.iiñ
dar pe tab us ke irāda jab.ha-sā.ī kā karūñ
ḳhuub sī tambīh karnā ai judā.ī tū mujhe
gar kisī se phir kabhī qasd āshnā.ī kā karūñ
gar musaḳhḳhar hove vo ḳhurshīd-rū merā 'bayāñ'
bādshāhī kyā ki maiñ daavā ḳhudā.ī kā karūñ