terā sitam jo mujh se gadā ne sahā sahā
tū bādshah hai jo mujhe tū ne kahā kahā
dāman tere se lag luuñ agar de razā mujhe
ye nā-tavāñ ġhubār agar yaañ rahā rahā
rakh āstīñ shitāb mirī chashm-e-tar pe jaañ
varna phire hai sail meñ aalam bahā bahā
nikle hai laala ḳhaak ke nīche se surḳh surḳh
rañgīñ huā shahīdoñ ke ḳhuuñ meñ nahā nahā
ab jī ke Dar se us ko 'bayāñ' tū na chhoḌiyo
haiñ mard ve ki baañh ko jis kī gahā gahā