ye ḳhūb-rū na chhurī ne kaTār rakhte haiñ
nigāh-e-lutf se aalam ko maar rakhte haiñ
charāġh-e-gor na sham-e-mazār rakhte haiñ
bas ek ham ye dil dāġhdār rakhte haiñ
sharāb-e-ishq na ai dost pījiyo hargiz
isī nashe kā ham ab tak ḳhumār rakhte haiñ
mirī zabānī koī us se is qadar pūchhe
kahīñ ye jhūTe bhī vaade shumār rakhte haiñ
qayāmat aa chukī dīdār-e-haq huā sab ko
ham ab talak bhī tirā intizār rakhte haiñ
agarche ḳhaak barābar kiyā falak ne 'bayāñ'
dimāġh par vahī ham ḳhāksār rakhte haiñ