ret pe sāhil kī apne naqsh-e-pā chhoḌ aa.e haiñ

ai havā tere liye apnā patā chhoḌ aa.e haiñ

lauT kar dekheñge us ke aage us ne kyā likhā

Diary meñ us kī ik pannā muḌā chhoḌ aa.e haiñ

yuuñ asar-andāz akele-pan kā dukh ham pe huā

tote ke pinjre ko āñgan meñ khulā chhoḌ aa.e haiñ

shahr meñ aa kar bhaTakte phir rahe haiñ dar-ba-dar

sīdhā sā har rasta apne gaañv kā chhoḌ aa.e haiñ

guzre kyuuñ māyūs ho kar sūrat-e-sā.il huā

ik diyā dahlīz par jaltā huā chhoḌ aa.e haiñ

jaale bun kar makaḌiyāñ mahfūz rakheñgī use

vaqt-e-ruḳhsat ghar meñ naam allāh kā chhoḌ aa.e haiñ

us ke ḳhālī-pan ko bhī bharne kī socheñ ai 'niyāz'

vaise to ration kā har Dibbā bharā chhoḌ aa.e haiñ