sab kī bigḌī ko banāne nikle
yaar ham tum bhī divāne nikle
dhuul hai ret hai sahrā hai yahāñ
ham kahāñ pyaas bujhāne nikle
itnī raunaq hai ki jī Dūbtā hai
shahr meñ ḳhaak uḌāne nikle
in añdheroñ meñ kiran jab DhūñDī
sab ke hañsne ke bahāne nikle
koī to chiiz na.ī mil jaatī
dard bhī sadiyoñ purāne nikle
chāñd ko raat meñ maut aa.ī thī
laash ham din ko uThāne nikle
umr barbād yūñhī kar dī 'hasan'
ḳhvāb bhī kitne suhāne nikle