vahī safar jo pas-e-kārvāñ nahīñ hotā
mirā safar hai kabhī rā.egāñ nahīñ hotā
maiñ chāhtā huuñ ki armān dastaras meñ raheñ
mujhe patā hai ki baam āsmāñ nahīñ hotā
hazār chīḳhoñ meñ suntā huuñ us kī ḳhāmoshī
koī bhī zaḳhm kabhī be-zabāñ nahīñ hotā
agar vo dariyā tire shahr se guzartā nahīñ
ravāñ to hotā par itnā ravāñ nahīñ hotā
maiñ aise jaltā huuñ jaise ki bujh rahā ho koī
tū aisī aag hai jis kā dhuāñ nahīñ hotā