āsmāñ thā tum the yā merā sitārā kaun thā
merī har manzil masāfat se badaltā kaun thā
bas yūñhī ik zid meñ saarī zindagī barbād kī
jāntā huuñ rog kyā the aur mudāvā kaun thā
har qadam taaza kumak miltī rahī apne ḳhilāf
merā apnā hī adū mere alāva kaun thā
kyā kisī ummīd par phir se dar-e-dil vā karūñ
tujh se baḌh kar ḳhud batā merā shanāsā kaun thā
vo to maiñ bas pyaar kar baiThā kisī se ai ḳhudā
varna tere in khilaunoñ se bahaltā kaun thā