na jaane kaisī āñdhī chal rahī hai
hai jañgal ḳhush ki bastī jal rahī hai
kahīñ paanī se dhokā khā na jaanā
ye naddī muddatoñ daldal rahī hai
tirā sūraj bhī ThanDā ho rahā hai
hamārī umr bhī ab Dhal rahī hai
koī shikva nahīñ ham ko kisī se
ḳhud apnī zaat ham ko chhal rahī hai
hameñ barbād kar ke ḳhush bahut thī
magar ab haath duniyā mal rahī hai
tumhāre lafz sho.ale kyuuñ hue haiñ
ġhazal lagtā hai jaise jal rahī hai