duniyā-e-tasavvur ham ābād nahīñ karte
yaad aate ho tum ḳhud hī ham yaad nahīñ karte
vo jaur-e-musalsal se baaz aa to ga.e lekin
be-dād ye kyā kam hai be-dād nahīñ karte
sāhil ke tamāshā.ī har Dūbne vaale par
afsos to karte haiñ imdād nahīñ karte
kuchh dard kī shiddat hai kuchh pās-e-mohabbat hai
ham aah to karte haiñ fariyād nahīñ karte
sahrā se bahāroñ ko le aa.e chaman vaale
aur apne gulistāñ ko ābād nahīñ karte