diloñ meñ ḳhauf ke chūlhe kī aag ThanDī ho
kabhī na milne-milāne kī aag ThanDī ho
ham ek saath uThā laa.e the ye hijr kī aag
ḳhudā kare, tire hisse kī aag ThanDī ho
pighal rahe haiñ ham ik fāsle pe baiThe hue
gale lago ki ye siine kī aag ThanDī ho
pukārtā hai mujhe kyuuñ abhī se dūsrā ishq
abhī to fikr hai pahle kī aag ThanDī ho
maiñ is liye bhī tirī haañ meñ haañ milātā rahā
kisī tarah tire lahje kī aag ThanDī ho
mire harīf se kah do use muaaf kiyā
maiñ chāhtā huuñ ki badle kī aag ThanDī ho