kamāl-e-be-ḳhabarī ko ḳhabar samajhte haiñ
tirī nigāh ko jo mo'tabar samajhte haiñ
faroġh-e-tūr kī yuuñ to hazār tāvīleñ
ham ik charāġh-e-sar-e-rahguzar samajhte haiñ
lab-e-nigār ko zahmat na do ḳhudā ke liye
ham ahl-e-shauq zabān-e-nazar samajhte haiñ
janāb-e-shaiḳh samajhte haiñ ḳhuub rindoñ ko
janāb-e-shaiḳh ko ham bhī magar samajhte haiñ
vo ḳhaak samjheñge rāz-e-gul-o-saman 'tābāñ'
jo rañg-o-bū ko fareb-e-nazar samajhte haiñ