laa.ī tirī mahfil meñ mujhe ārzū-e-dīd
darpesh hai phir marhala-e-tūr kī tajdīd
māyūs tamannāoñ ko ai dost tirī yaad
jaise ufq-e-bīm pe ik aḳhtar-e-ummīd
ḳhud apnā qafas ban ga.ī kotāhi-e-parvāz
kuchh duur nahīñ varna jahān-e-mah-o-ḳhurshīd
ek ek adā shauq kī tahzīb pe maa.il
ek ek nazar shoḳhi-e-jazbāt kī tanqīd
jo ḳhud na samajh paa.e vo samjhā.e to kaise
afkār meñ ib.hām to guftār meñ tāqīd
jiinā bhī ibādat use piinā bhī ibādat
hāsil ho jise chashm-e-siyah-mast kī tā.īd
pindār-e-junūñ ho na sakā rām-e-gudā.ī
raas aa.e na 'tābāñ' mujhe altāf-e-sanādīd