koī baaġh sā sajā huā mire sāmne

ki badan hai koī khilā huā mire sāmne

vahī aañkh hai ki sitāra hai mire rū-ba-rū

ye charāġh kyā hai jalā huā mire sāmne

mirī ḳhvāb-gāh meñ raat kaisā ḳhumār thā

koī jaam sā thā dharā huā mire sāmne

maiñ khaḌā huā thā ajiib vahm o gumān meñ

dar-e-ḳhvāb shab thā khulā huā mire sāmne

kabhī lauT aayā maiñ dasht se to ye shahr bhī

usī gard meñ thā aTā huā mire sāmne

mirā rāsta tire rāste se alag huā

yahī rāsta thā bachā huā mire sāmne