dil par kisī patthar kā nishāñ yuuñ hī rahegā

tā-umr ye shīshe kā makāñ yuuñ hī rahegā

ham Thahre raheñge kisī tābīr ko thāme

āñkhoñ meñ koī ḳhvāb ravāñ yuuñ hī rahegā

hai dhund meñ Duubā huā is shahr kā manzar

kyā jāniye kab tak ye samāñ yuuñ hī rahegā

kuchh der rahegī abhī bāzār kī raunaq

kuchh der ye hone kā gumāñ yuuñ hī rahegā

bujh jā.egā ik roz tirī yaad kā shola

lekin mire siine meñ dhuāñ yuuñ hī rahegā

lau de to rahā hai mire ḳhvāboñ ke ufuq par

lekin ye sitāra bhī kahāñ yuuñ hī rahegā