dard leñge na ham davā leñge
apne hisse kī kuchh sazā leñge
baat vo jo kabhī huī hī nahīñ
ham usī baat kā mazā leñge
log vaise bhī āzmāte haiñ
log aise bhī aazmā leñge
kāñch sā dil kahāñ pe rakhkhoge
log patthar agar uThā leñge
tum bhī sūraj ko sāmne rakhnā
ham bhī apne diye jalā leñge
vo agar ban gayā koī manzar
ham use aañkh meñ sajā leñge
vo ujālā hai ham ujāle ko
dil-e-tārīk meñ chhupā leñge