Meer Taqi Meer

ba-rang-e-bu-e-gul us bagh ke hum aashna hote

Meer Taqi Meer

Agra, Uttar pradesh, India

1722-1810

ba-rañg-e-bū-e-gul us baaġh ke ham āshnā hote

ki hamrāh-e-sabā Tuk sair karte phir havā hote

sarāpā aarzū hone ne banda kar diyā ham ko

vagarna ham ḳhudā the gar dil-e-be-mudda.ā hote

falak ai kaash ham ko ḳhaak rakhtā ki is meñ ham

ġhubār-e-rāh hote kasū ḳhāk-e-pā hote

ilāhī kaise hote haiñ jinheñ hai bandagī ḳhvāhish

hameñ to sharm dāman-gīr hotī hai ḳhudā hote

hai kis nāhiye se ai dayār-e-ishq kyā jānūñ

tire bāshindagāñ ham kaash saare bevafā hote

ab aise haiñ ki sāne.a ke mizāj uupar baham pahuñche

jo ḳhātir-ḳhvāh apne ham hue hote to kyā hote

kahīñ jo kuchh malāmat gar bajā hai 'mīr' kyā jāneñ

unheñ ma.alūm tab hotā ki vaise se judā hote

Top Urdushayar.com